ಇಂದಿನಿಂದ ಮೂರು ದಿನಗಳ ಕಾಲ ವಿವಿಧ ಧಾರ್ಮಿಕ ಕಾರ್ಯಕ್ರಮ: ಯತಿದ್ವಯರ ಸಾನಿಧ್ಯ
ಸಿದ್ದಾಪುರ: ತಾಲೂಕಿನ ಬಾಳೂರು ಮಲ್ಲಿಕಾರ್ಜುನ ದೇವಸ್ಥಾನ ಟ್ರಸ್ಟ್ ಹಾಗೂ ಸೀಮಾ ಪರಿಷತ್ ಬಾಳೂರಿನ ನೂತನ ದೇವಾಲಯದ ಲೋಕಾರ್ಪಣೆ ಹಾಗೂ ಮಲ್ಲಿಕಾರ್ಜುನ ದೇವರ ಪುನರ್ ಪ್ರತಿಷ್ಠಾಪನೆ ಇಂದು ಜ.31 ರಿಂದ ಫೆ.2ರವರೆಗೆ ವಿವಿಧ ಧಾರ್ಮಿಕ ಕಾರ್ಯಕ್ರಮದೊಂದಿಗೆ ನಡೆಯಲಿದೆ ಎಂದು ದೇವಾಲಯದ ಅಧ್ಯಕ್ಷ ರಾಮಚಂದ್ರ ಡಿ.ಭಟ್ಟ ಊರತೋಟ ಹೇಳಿದರು.
ಅವರು ಬಾಳೂರು ಮಲ್ಲಿಕಾರ್ಜುನ ದೇವಾಲಯದಲ್ಲಿ ಗುರುವಾರ ಮಾತನಾಡಿ ಬಾಳೂರು ಒಂದು ಐತಿಹಾಸಿಕ ಹಾಗೂ ಅನೇಕ ದೇವತಾ ಸಾನ್ನಿಧ್ಯಗಳನ್ನು ಹೊಂದಿದ ಕ್ಷೇತ್ರವಾಗಿದೆ. ಇಲ್ಲಿ ನೆಲೆನಿಂತ ಮಲ್ಲಿಕಾರ್ಜುನ ಲಿಂಗವು ಸಾಕ್ಷಾತ್ ಶ್ರೀಶೈಲದ ಮಲ್ಲಿಕಾರ್ಜುನ ದೇವಾಲಯದಿಂದ ಸಂಗ್ರಹಿಸಲ್ಪಟ್ಟಿದೆ ಎಂಬ ಪ್ರತೀತಿ ಇದೆ. ರಾಜಾಡಳಿತದ ಕಾಲದ ದೇವಾಲಯ ಇದಾಗಿದ್ದು ಸುಮಾರು ಎಂಟು ನೂರು ವರ್ಷಗಳಷ್ಟು ಹಳೆಯದಾಗಿದೆ. ನೂತನ ದೇವಾಲಯ ಹಾಗೂ ಸಮ್ಮುಚ್ಚಯ ನಿರ್ಮಾಣಕ್ಕೆ ಸುಮಾರು 1.5 ಕೋಟಿ ತಗುಲಿದೆ. ದೇವಾಲಯದ ಭಕ್ತರು, ದಾನಿಗಳು ಹಾಗೂ ಸರ್ಕಾರವೂ ಸಹ ದೇವಾಲಯ ನಿರ್ಮಾಣಕ್ಕೆ ಆರ್ಥಿಕ ಸಹಕಾರ ನೀಡಿದೆ.
ಈಗಾಗಲೇ ದೇವಾಲಯದಲ್ಲಿ ದೇವರ ಪುನರ್ ಪ್ರತಿಷ್ಠಾಪನೆ ಅಂಗವಾಗಿ ವಿವಿಧ ದಾರ್ಮಿಕ ಕಾರ್ಯಕ್ರಮಗಳು ಆರಂಭಗೊಂಡಿದೆ. ಜ.31ರಂದು ಬೆಳಗ್ಗೆ ಚಂಡಿಕಾ ಹೋಮ, ಮಹಾರುದ್ರ ಪಾರಾಯಣ ಹಾಗೂ ಮಾತೆಯರಿಂದ ಕುಂಕುಮಾರ್ಚನೆ ನಂತರ ಪ್ರಸಾದ ಭೋಜನ.ಮಧ್ಯಾಹ್ನ 3.30ರಿಂದ ವಿ.ವಿಶ್ವನಾಥ ಭಟ್ಟ ನೀರಗಾನ ಇವರಿಂದ ಧಾರ್ಮಿಕ ಪ್ರವಚನ ನಂತರ ಸ್ಥಳೀಯರಿಂದ ಭಜನಾ ಸೇವೆ.
ಫೆ.1ರಂದು ದೇವಾಲಯ ಲೋಕಾರ್ಪಣೆ, ಮಹಾರುದ್ರಯಾಗ, ಪ್ರಸಾದ ಭೋಜನ. ಮಧ್ಯಾಹ್ನ 3.30ರಿಂದ ವಿ.ಚಂದ್ರಶೇಖರ ಭಟ್ಟ ಗಾಳೀಮನೆ ಇವರಿಂದ ಧಾರ್ಮಿಕ ಪ್ರವಚನ ನಂತರ ಸ್ಥಳೀಯರಿಂದ ಭಜನಾ ಸೇವೆ ನಡೆಯಲಿದೆ.
ಫೆ.2ರಂದು ಸ್ವರ್ಣವಲ್ಲಿ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳು ಹಾಗೂ ಶ್ರೀಮನ್ನೆಲೆಮಾವ ಮಠದ ಶ್ರೀ ಮಾಧವಾನಂದ ಭಾರತೀ ಮಹಾಸ್ವಾಮಿಗಳು ದೇವಾಲಯಕ್ಕೆ ಆಗಮಿಸಲಿದ್ದು ಉಭಯ ಶ್ರೀಗಳವರನ್ನು ಪೂರ್ಣಕುಂಭದೊಂದಿಗೆ ಸ್ವಾಗತಿಸಲಾಗುತ್ತದೆ.
ನಂತರ ವಿಷ್ಣು ಹೋಮ, ಮಾರುತಿ ಹವನ, ಉಭಯ ಶ್ರೀಗಳವರ ಪಾದಪೂಜೆ, ಭೀಕ್ಷಾ ವಂದನೆ, ತೀರ್ಥ ಪ್ರಸಾದ ಸ್ವೀಕಾರ ನಂತರ ಪ್ರಸಾದ ಭೋಜನ.
ಮಧ್ಯಾಹ್ನ 3.30ರಿಂದ ಶ್ರೀ ಮಲ್ಲಿಕಾರ್ಜುನ ವೇದಿಕೆಯಲ್ಲಿ ಸಮಾರೋಪ ಸಮಾರಂಭ ನಡೆಯಲಿದ್ದು ಸ್ವರ್ಣವಲ್ಲಿ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳು ಹಾಗೂ ಶ್ರೀಮನ್ನೆಲೆಮಾಂವ ಮಠದ ಶ್ರೀ ಮಾಧವಾನಂದ ಭಾರತೀ ಮಹಾಸ್ವಾಮಿಗಳು ದಿವ್ಯ ಸಾನ್ನಿಧ್ಯವಹಿಸುವರು.
ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳು ವೈದ್ಯ, ಆಡಳಿತ ಸುಧಾರಣಾ ಸಮಿತಿ ಅಧ್ಯಕ್ಷ ಆರ್.ವಿ.ದೇಶಪಾಂಡೆ, ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ, ಶಾಸಕರಾದ ಭೀಮಣ್ಣ ನಾಯ್ಕ, ಶಿವರಾಮ ಹೆಬ್ಬಾರ, ಎಸ್.ವಿ. ಸಂಕನೂರು, ಶಾಂತಾರಾಮ ಸಿದ್ದಿ, ಪ್ರಮುಖರಾದ ವಿ.ಎನ್.ಹೆಗಡೆ ಬೊಮ್ಮನಳ್ಳಿ, ಪ್ರದೀಪ ಹೆಗಡೆ ಕರ್ಜಗಿ, ಡಾ.ಶಶಿಭೂಷಣ ಹೆಗಡೆ, ಗೋಪಾಲಕೃಷ್ಣ ವೈದ್ಯ, ರಾಮಕೃಷ್ಣ ಹೆಗಡೆ ಕಡವೆ, ಆರ್.ಎಂ.ಹೆಗಡೆ ಬಾಳೇಸರ, ಭಾಸಕರ ಚಕ್ರವರ್ತಿ, ಸಿ.ಜಯಪ್ರಕಾಶ, ಉಪೇಂದ್ರ ಪೈ, ಶಂಕರ ಭಟ್ಟ ಮಸ್ಗುತ್ತಿ, ವಿ.ಡಿ.ಭಟ್ಟ ಊರತೋಟ ಉಪಸ್ಥಿತರಿರುತ್ತಾರೆ. ಇದೇ ಸಂದರ್ಭದಲ್ಲಿ ಶಿವಾರ್ಪಣಂ ಸ್ಮರಣ ಸಂಚಿಕೆ ಬಿಡುಗಡೆಗೊಳ್ಳಲಿದೆ ನಂತರ ರಾತ್ರಿ 9ರಿಂದ ಹಿಲ್ಲೂರು ಯಕ್ಷ ಮಿತ್ರ ಬಳಗದವರಿಂದ ಯಕ್ಷಗಾನ ಪ್ರದರ್ಶನಗೊಳ್ಳಲಿದೆ ಎಂದು ಹೇಳಿದರು.
ದೇವಾಲಯದ ಉಪಾಧ್ಯಕ್ಷ ವೆಂಕಟರಮಣ ಭಟ್ಟ ಮಸ್ಗುತ್ತಿ, ಕಾರ್ಯದರ್ಶಿ ರಾಜಾರಾಮ ಹೆಗಡೆ ಹೊಸ್ಮನೆ, ನಾಗಪತಿ ಭಟ್ಟ ಮಿಳಗಾರ, ಗಣಪತಿ ಭಟ್ಟ ಊರತೋಟ,ಜಿ.ಪಿ.ಭಟ್ಟ ಕಲ್ಮನೆ, ಜಿ.ಎಂ.ಹೆಗಡೆ ಹೊಸ್ಗದ್ದೆ, ಅರ್ಚಕರಾದ ವೇ.ಸುಬ್ರಾಯ ಭಟ್ಟ ಬಾಳೂರು, ಪುರೋಹಿತರಾದ ವೇ.ವೆಂಕಟರಮಣ ಭಟ್ಟ ಹೆಗ್ಗಾರಬೈಲ್ ಉಪಸ್ಥಿತರಿದ್ದರು.
